Як працы гімн, звініць хвала рукам, што пахнуць хлебам! Земляробы Воранаўшчыны святкавалі «Дажынкі-2025»

Хваляванне залатой нівы, чарада магутных камбайнаў, руплівая праца хлебаробаў ад світанку да змяркання… Усё гэта нязменныя складальнікі жніва. А стома ад нялёгкай працы кудысьці знікае ў раз, калі земляробы бяруць у рукі духмяны, толькі што выпечаны хлеб з новага ўраджаю. Яшчэ адзін аграрны год, што хутка падыдзе да лагічнага завяршэння, пражыты недарэмна. Будзем багаты, бо будзем з хлебам! На гарадскім стадыёне ў Воранаве ў пятніцу скрозь лунаў святочны настрой. Прыгожа прыбраныя хлебаробы раёна цёпла віталі адзін аднаго, выказваючы шчырая словы віншавання з важкім караваем. У святочнай калоне аграрыі начале з кіраўнікамі сельгаспрадпрыемстваў рушылі да галоўнай сцэны. Уперадзе — сёлетнія лідары, а пераможцаў вызначылі ва ўпраўленні сельскай гаспадаркі і прамысловасці райвыканкама з улікам пладавітасці глебы. Пад цёплыя сяброўскія апладысменты займалі сваё пачэснае месца хлебаробы. У тройцы перадавікоў — земляробы КСУП “Гіркі”, якія намалацілі больш за 15 тысяч тонн зерневых і зернебабовых культур, КСУП “Місявічы”, у чыіх засеках звыш 11 600 т, КСУП “Больцішкі”, здабыўшыя пад 7 тысяч тон. З даўніх часоў у беларусаў склаліся трапяткія адносіны да хлеба, які, як вядома, усяму галава. Традыцый продкаў прытрымліваюцца і суайчыннікі. Як належыць гасцінным гаспадарам, у пачатку фэсту абсыпалі ўсіх зернем — хай будуць здаровымі, дужымі і багатымі! І канешне ж, асвяцілі хлеб. Воранаўскія праваслаўны і каталіцкі святары Ігар Валошын і Уладзімір Буклярэвіч блаславілі плён працы земляробаў. Радасныя моманты свята з гаспадарамі воранаўскай зямлі раздзялілі старшыня камітэта па сельскай гаспадарцы і харчаванні Гродзенскага аблвыканкама Ігар Сарокін і старшыня абласной арганізацыі прафсаюза работнікаў АПК Міхаіл Сіцько. — Сёлета намалочана амаль 110 тысяч тон збожжа, сярэдняя ўраджайнасць склала пад 54 цэнтеры з гектара, што вышэй абласнога паказчыка. У гэтым заслуга кожнага камбайнера і вадзіцеля, агранома і селекцыянера, работніка зернесушыльных комплексаў і кіраўніка сельгаспрадпрыемства, а таксама ўсіх жыхароў Воранаўшчыны, хто аказваў дапамогу аграрыям у жатву, — адкрыў урачыстасць глава раёна Васіль Шлык. — Зараз хлебаробы святкуюць завяршэнне ўборачнай кампаніі, але праца на палях Воранаўшчыны кіпіць па-ранейшаму: закладваецца база пад новы ўраджай. І так будзе заўсёды, таму што сельская гаспадарка — гэта бесперапынны працэс, які не ведае выхадных і святочных дзён. І гэтую галіну выбіраюць толькі самыя моцныя і годныя людзі! Дзякуй вам, паважаныя хлебаробы, за вашу нялёгкую працу. Няхай кожны ваш дзень будзе напоўнены радасцю здзяйсненняў, кожны сноп — багатым зернем, а гаспадарка — квітнеючай і моцнай! Сапраўды, прафесія хлебароба была і застаецца важнай і адной з самых паважаных, бо каб вырасціць колас патрэбна праца не аднаго дзясятка рук. І тых, хто ў жніво забыўся пра доўгі аддпачынак, хто ўнёс знакавы ўклад у харчовую бяспеку краіны, ушаноўвалі на галоўнай сцэне фэсту. Бяспрэчнымі лідарамі на ўборцы прызнаны дырэктары і галоўныя аграномы: Тадэвуш Мушынскі і Валерый Вінцкевіч з КСУП “Гіркі”, Андрэй Бурнос і Аляксандр Круповіч з КСУП “Місявічы”, Андрэй Крахмальчык і Вадзім Страчынскі з КСУП “Больцішкі”. Лепшыя камбайнеры працуюць у КСУП “Доцішкі”. Перамогу ў спаборніцтве за дасягненне высокіх паказчыкаў на жатве з улікам ўросту і мадэлі транспарта атрымалі Пётр Барташэвіч, Алег Лабовіч і Генадзій Ульбін. Вылучыліся вадзіцелі Іосіф Зубовіч і Раман Лагеза з КСУП “Місявічы”, Часлаў Вайткевіч з КСУП “Эліт-Агра Больцінікі”, а таксама брыгады зернесушыльных установак — Валерый Вайткун і Валерый Андруконіс, Ян Савуль і Дзмітрый Андруконіс з КСУП “Доцішкі”, Дзмітрый Запаснік і Віктар Пышынскі з КСУП “Місявічы”. На родных палетках добра папрацавала і моладзь. Лепшымі маладымі камбайнерамі прызнаны Марэк Кодзь з КСУП э/б “Кастрычнік”, Валерый Шадзюль з КСУП э/б “Пагародна” і Павел Брэнько з СУП “ГМК-Агра”. Абсалютным лідарам раённага этапу праекта “Моладзь за ўраджай” — Дзмітрый Вайтоніс з КСУП “Гіркі”. Сярод маладых вадзіцелей у спаборніцтве не было роўных Міраславу Балінскаму з КСУП э/б “Пагародна”. У перадавіках таксама вадзіцелі Віталій Кель з КСУП э/б “Кастрычнік” і Віктар Лукашэвіч з КСУП “Гіркі”. Поспехі землякоў на жніве былі адзначаны Ганаровай граматай камітэта па сельскай гаспадарцы і харчаванні аблвыканкама. Узнагароду атрымалі вадзіцель Анатолій Каневіч з КСУП “Больцішкі”, камбайнер Іван Лукашэвіч з КСУП “Гіркі”, начальнік вытворчага ўчастка Іван Зверка з СУП “ГМК-Агра”, адказны за сушыльнае абсталяванне Уладзімір Банцавіч з КСУП э/б “Кастрычнік” і загадчык склада КСУП э/б “Пагародна” Тэрэса Лябецкая. Падзячны ліст Воранаўскага райсавета дэпутатаў уручаны галоўнаму аграному КСУП “Доцішкі” Анатолію Міхневічу, камбайнеру КСУП “Місявічы” Уладзіміру Ордзе і вадзіцелю КСУП э/б “Кастрычнік” Уладзіміру Салмановічу. Ганаровай граматай абласнога галіновага прафсоюза ўзнагароджаны механізатар Валяр’ян Козар з СУП “ГМК-Агра”, механізатары Аляксандр Паўловіч і Дзяніс Паўловіч з КСУП “Больцішкі”, вадзіцель Станіслаў Салабуда з КСУП “Місявічы” і аператар сушыльных установак Ігар Картановіч з КСУП “Эліт-Агра Больцінікі”. Штогод немалы ўнёсак у хлебаробскую справу робяць жанчыны. Яны здольны і штурвалам камбайна кіраваць, і ўраджай багаты на палетках вырошчваць. У рамках праета “Хлеб на далонях жанчыны” ўшанавалі агарнома-насеннявода Ангеліну Мажэйку з КСУП э/б “Пагародна”, бухгалтара Наталлю Вайткевіч з КСУП “Больцішкі”, сакратара Тэрэсу Краўніс з КСУП “Місявічы”, намесніка галоўнага бухгалтара Рэгіну Вайцюкевіч з СУП “ГМК-Агра”, эканаміста Надзею Барташэвіч з КСУП “Доцішкі”, агранома-насеннявода Наталлю Сініцкую з КСУП “Гіркі”, кладаўшчыка зернесклада КСУП “Эліт-Агра Больцінікі” Таццяну Міхалькевіч і вядучага дыспетчара Яніну Швед з КСУП э/б “Кастрычнік”. Добры настрой хлебаробам падаравалі артысты Воранаўшчыны. Звонкія лірычныя кампазіцыі ішлі ад душы, таму і ўспрымаліся на ўра. Адпачывалі, набіраліся сіл на працу хлебаробы, бо, як водзіцца, восенню работ восем. Марына КАНДРАТОВІЧ. Фота Алега БЕЛЬСКАГА. Больше фото: https://www.voran.by/news/novosti-voronovshchiny/yak-pratsy-gimn-zvinits-khvala-rukam-shto-pakhnuts-khlebam-zemlyaroby-vorana-shchyny-svyatkavali-dazh.html