Мінлясгас прапануе беларусам драўляныя дамы плошчай 50-60 кв.м

Мінлясгас прапануе беларусам драўляныя дамы плошчай 50-60 кв.м. Аб гэтым сказаў журналістам міністр лясной гаспадаркі Аляксандр Кулік перад пачаткам 22-га пасяджэння Міжурадавага савета па лесапрамысловым комплексе і лясной гаспадарцы сярод краін - удзельніц СНД, перадае карэспандэнт БЕЛТА. "Працэс ідзе. Як кажуць, павольна запрагаем - хутка едзем. Спачатку мы распрацавалі праекты дамоў, далей трэба было атрымаць усю неабходную тэхнічную дакументацыю, прайсці сертыфікацыю. Цяпер мы рэалізуем пілотныя праекты - будуем вуліцу драўляных дамоў пад Гроднам, таксама ў новым катэджным пасёлку каля вёскі Аколіца Мінскай вобласці ёсць нашы дамы. Заяўкі на 21 домакамплект мы атрымалі ад грамадзян. Цяпер працуем над іншымі варыянтамі дамоў меншай плошчы. Калі раней мы прапаноўвалі дамы плошчай 100 кв.м, то цяпер распрацоўваем дачныя домікі на 50-60 кв.м. Думаю, яны таксама будуць запатрабаваны", - сказаў Аляксандр Кулік. Беларусь прымае 22-е пасяджэнне Міжурадавага савета па лесапрамысловым комплексе і лясной гаспадарцы сярод краін - удзельніц СНД. У вочным фармаце ў Мінску выступяць кіраўнікі (іх намеснікі) лясных ведамстваў з Беларусі, Расіі, Казахстана і Арменіі. У відэафармаце да абмеркаванняў далучацца лесаводы з Кыргызстана і Таджыкістана. Чакаецца, што ў рамках пасяджэння будзе разгледжаны шырокі пералік пытанняў. У іх ліку прафілактыка і тушэнне прыродных пажараў на прыгранічных тэрыторыях, меры па барацьбе з нелегальным абаротам драўніны, інвентарызацыя дагаворна-прававой базы ў галіне лясной гаспадаркі і лясной прамысловасці і інш. Апошні раз Беларусь прымала такі форум у 2017 годзе.-0- БЕЛТА - Навiны Беларусi