Каранік аб супрацоўніцтве з Кітаем: ёсць патэнцыял росту не на працэнты, а ў разы

Супрацоўніцтва ў гандлёва-эканамічнай, інвестыцыйнай і гуманітарнай сферах абмеркавалі ў ходзе рабочай сустрэчы старшыня Гродзенскага аблвыканкама Уладзімір Каранік і пасол Кітая ў Беларусі Се Сяаюн, перадае карэспандэнт БЕЛТА. Кіраўнік дыпламатычнай місіі КНР упершыню наведаў Гродзенскую вобласць. На сустрэчы бакі абазначылі цвёрдую прыхільнасць да нарошчвання патэнцыялу супрацоўніцтва, прадставілі свае прапановы ў розных сферах, абмеркавалі перспектыўныя праекты. "Кітайская Народная Рэспубліка займае трэцяе месца па аб'ёме тавараабароту ў нашым рэгіёне і дэманструе вельмі добрую дынаміку росту, - адзначыў Уладзімір Каранік. - Аналіз паказвае, што гэта ўзаемавыгаднае супрацоўніцтва і рост яго аб'ёмаў вельмі збалансаваны. Нарошчваюцца як экспарт, так і імпарт". Кіраўнік гродзенскага рэгіёна абазначыў перспектывы ў шэрагу сфер, у якіх ёсць рэальная магчымасць дабіцца высокага выніку. Гэта рост тавараабароту, інвестыцыйная дзейнасць, міжасобаснае ўзаемадзеянне і развіццё супрацоўніцтва на ўзроўні культур. "У апошнія гады наш тавараабарот паказвае дадатную дынаміку, - падкрэсліў Уладзімір Каранік. - Нам ёсць што прапанаваць адзін аднаму. Органы кіравання проста аказваюць садзейнічанне для таго, каб быў забяспечаны ўзаемны доступ на рынкі, а рэальны сектар эканомікі сам знаходзіць тыя нішы, якія запатрабаваны ў КНР. З другога боку, у мэтах насычэння патрэбнымі таварамі нашага рынку займаецца зваротнымі пастаўкамі. Гэта збалансаванае супрацоўніцтва з добрай дынамікай унушае вялікі аптымізм. Мы разумеем, што яго перспектывы велізарныя. Упэўнены, што ў бліжэйшы час зможам гаварыць аб росце не на працэнты, а ў разы". Старшыня аблвыканкама зрабіў асаблівы акцэнт на тым, што наша супрацоўніцтва грунтуецца на прынцыпах узаемнай павагі і раўнапраўя. "Тая высокая планка адносін, якую задалі Прэзідэнт Беларусі Аляксандр Лукашэнка і Старшыня Кітайскай Народнай Рэспублікі Сі Цзіньпін, абавязвае нас рухацца наперад, дае разуменне, што на гэтых рынках нас чакаюць, ёсць тое, чаму мы можам павучыцца і што можам пераняць. Нашы кіраўнікі прытрымліваюцца аднолькавых прынцыпаў у тым, што супрацоўніцтва павінна быць узаемавыгадным". Паводле слоў Уладзіміра Караніка, на фоне істотнага росту тавараабароту (практычна ў паўтара раза ў мінулым годзе) тэндэнцыя росту прадоўжылася за 4 месяцы гэтага года. "Расце колькасць пазіцый, - сказаў кіраўнік рэгіёна. - Гэта нашы прадукты харчавання і перапрацоўкі, якія запатрабаваны ў Кітаі, і ёсць магчымасці пашырыць аб'ёмы. У нас ёсць сур'ёзныя магчымасці ў дрэваапрацоўцы, і тут можна знайсці добрыя нішы. Нам цікава супрацоўніцтва ў галіне медыцыны. Мы са свайго боку зацікаўлены ў машынах і абсталяванні, якія пастаўляюць нам кітайскія партнёры. Многія прадпрыемствы рэгіёна ўжо выкарыстоўваюць кітайскае абсталяванне і маюць зацікаўленасць у пашырэнні паставак, асабліва ў святле рэалізуемых інвестпраектаў". Се Сяаюн падзякаваў Уладзіміру Караніку за запрашэнне наведаць Гродзенскую вобласць. "У 2020 годзе Прэзідэнт Беларусі Аляксандр Лукашэнка і Старшыня КНР Сі Цзіньпін на палях форуму ШАС у Самаркандзе сумесна заявілі аб павышэнні кітайска-беларускіх адносін да статусу ўсепагоднага ўсебаковага стратэгічнага партнёрства, - падкрэсліў Надзвычайны і Паўнамоцны Пасол Кітая ў Беларусі. - Нашы ўзаемаадносіны зрабілі гістарычны скачок. Супрацоўніцтва ў розных галінах атрымала моцны стымул. На працягу 2021-2023 гадоў нашы краіны аб'явілі аб тэматычных гадах супрацоўніцтва рэгіёнаў дзвюх краін. Мы разам правялі больш за дзвесце мерапрыемстваў, якія прыносяць плённыя вынікі ў сферы культуры, гандлю, інвестыцый, адукацыі і іншых на ўзроўні рэгіёнаў. Рэгіянальнае супрацоўніцтва становіцца новым пунктам развіцця нашых міждзяржаўных адносін". На думку кіраўніка дыпламатычнай місіі КНР, трэцяе месца сярод гандлёвых партнёраў Гродзенскай вобласці для Кітая далёка не мяжа. У нашых краін ёсць вялікі патэнцыял узаемадзеяння. Змястоўныя перагаворы, глыбокі абмен думкамі, праведзеныя ў час сустрэчы, будуць гэтаму садзейнічаць. Важны фактар у гэтым тое, што паміж Гродзенскай вобласцю і рэгіёнамі Кітая ўжо сфарміравалася пяць пабрацімскіх пар. Гэта стварае добрыя ўмовы для развіцця супрацоўніцтва. Абодва бакі адзначылі зацікаўленасць у актывізацыі супрацоўніцтва ў культурнай, турыстычнай сферах. Кітай валодае вельмі багатай гісторыяй, культурай. Гродзеншчыне таксама ёсць што паказаць і прапанаваць гасцям. Гродзенскай вобласцю заключаны пагадненні аб міжрэгіянальным супрацоўніцтве з правінцыямі Ганьсу і Хайнань. Падпісана пагадненне аб намерах з правінцыяй Фудзянь. Паміж раёнамі рэгіёна і правінцыямі Кітая дзейнічаюць 10 міжрэгіянальных дакументаў. У 2023 годзе Гродзенскай вобласцю экспартавана ў КНР тавараў на $122,5 млн. Тэмп росту экспарту склаў 137,4 працэнта.-0- БЕЛТА - Навiны Беларусi