Непагасны свет духоўнасці, нязломны дух абаронцы, узнёслы талент чалавека і прыгажосць роднай прыроды — усё гэта ўвабрала ў сябе наша НЕЗАЛЕЖНАСЦЬ. Яна гарант умацавання эканомікі, развіцця навукі і культуры, паляпшэнне дабрабыту беларускага народа. Пра мужнасць і гераізм вызваліцеляў беларускай зямлі ад нямецка-фашысцкіх акупантаў, пра маладую беларускую дзяржаўнасць, пра тых, хто сёння яе мацуе стараннай і эфектыўнай працай, пра планы і надзеі на будучае гаварылі вядучыя падчас урачыстасці.
— Дарагія землякі! Незалежнасць сучаснай Беларусі з'яўляецца вынікам гераічнай перамогі і працы нашых продкаў. Гэта свята — сімвал нацыянальнага адзінства і агульнай адказнасці за будучыню нашай Радзімы, — зазначыў у святочным звароце да землякоў і гасцей старшыня Воранаўскага райвыканкама Дзмітрый Захарчук. — Гарантыяй суверэннасці нашай дзяржавы з'яўляецца ўстойлівая эканоміка, і сваімі намаганнямі мы ўносім значны ўклад у развіццё Беларусі. У аснове нашых дасягненняў — прафесіяналізм, адказнасць і мэтанакіраванасць спецыялістаў аграрнага комплексу, працаўнікоў прамысловых прадпрыемстваў, сацыяльнай сферы, кіруючых кадраў. Спадзяемся, што наша моладзь будзе прытрымлівацца слаўных традыцый і памнажаць тыя багацці, якія збераглі нашы дзяды і прадзеды.
У гэты светлы і радасны дзень ад душы жадаю ўсім моцнага здароўя, радасці, аптымізму і дабрабыту! Няхай у кожным працоўным калектыве і ў кожнай сям'і заўсёды пануюць мір, узаемапавага і згода. Няхай гэтае свята паслужыць імпульсам для далейшай натхнёнай працы! З Днём Рэспублікі!
Дзмітрый Іванавіч шчыра прывітаў і гасцей свята: дэлегацыі з горада Несцерава Калінінградскай вобласці Расійскай Федэрацыі і з Гродзенскага дзяржаўнага ўніверсітэта імя Янкі Купалы.
З вялікай павагай і цеплынёй словы глыбокай ўдзячнасці гучалі ў адрас тых, хто сёння шчыруе на сваіх працоўных месцах, калектывам, якія па выніках працы занесены на раённую Дошку гонару. Па традыцыі пашаны ўдастойваецца і адна з шматдзетных сям’яў – сёлета гэта сям’я Івана і Валянціны Мяцюн.
Пасведчанні аб занясенні на раённую Дошку гонару і грашовыя ўзнагароджанні ўручыў старшыня райвыканкама. На сцэну падымаліся:
Штогод святкаванне Дня Незалежнасці Рэспублікі Беларусь у нашым раёне набывае новыя абрысы. Вось і сёлета для жыхароў райцэнтра і гасцей Воранаўшчыны арганізатары свята падрыхтавалі некалькі прыемных сюрпрызаў. З святочнай канцэртнай праграмай у Воранаве на галоўнай сцэне выступіў Нацыянальны акадэмічны народны хор Рэспублікі Беларусь імя Цітовіча. Гэта адзін з музычных брэндаў нашай краіны, які створаны выдатным дзеячам нацыянальнай музычнай культуры Беларусі Генадзем Цітовічам. Калектыў вызначае высокае выканальніцкае майстэрства, самабытнасць рэпертуару. Шырокі творчы дыяпазон дазваляе ахопліваць разнастайную тэматыку народных і аўтарскіх твораў, якія адлюстроўваюць усё багацце вобразаў і фарбаў нацыянальнага мастацтва.