"Марафон адзінства". Як будзе праходзіць рэспубліканская грамадска-культурная акцыя

Прэс-канферэнцыя аб падрыхтоўцы і правядзенні рэспубліканскай грамадска-культурнай акцыі "Марафон адзінства" пройдзе 25 верасня ў Нацыянальным прэс-цэнтры, пачатак у 15.00, паведамілі БЕЛТА арганізатары мерапрыемства.

На ўрачыстым мерапрыемстве да Дня народнага адзінства 17 верасня Прэзідэнт Беларусі Аляксандр Лукашэнка аб'явіў аб старце рэспубліканскай грамадска-культурнай акцыі "Марафон адзінства". "Гэта будзе марафон трыадзінства традыцый: нацыянальнай культуры, якую беражліва захоўваем і развіваем, талентаў нашых людзей, якімі славіцца беларуская зямля, прыгажосці славянскай душы, якая напаўняе свет вакол гармоніяй і ўзаемаразуменнем", - расказаў аб тым, чаго чакае ад маштабнай грамадска-культурнай акцыі, кіраўнік дзяржавы.

Як расказалі арганізатары, каманда прафесіяналаў даўно працуе над рэалізацыяй ідэі "Марафону адзінства". На сённяшні дзень ёсць дакладная дарожная карта па правядзенні акцыі. У падрыхтоўцы і правядзенні мерапрыемстваў акцыі "Марафон адзінства" задзейнічаны: Міністэрства культуры, Міністэрства інфармацыі, Міністэрства спорту і турызму, Мінгарвыканкам, абласныя выканаўчыя камітэты, ТАА "Музычная медыякампанія", ДУ "Палац Рэспублікі" Кіраўніцтва справамі Прэзідэнта Рэспублікі Беларусь, УП "БелТА", Федэрацыя прафсаюзаў Беларусі, БРСМ, Белтэлерадыёкампанія, Нацыянальная бібліятэка Беларусі, РДГА "Беларускае таварыства "Веды" і інш.

Мерапрыемствы акцыі "Марафон адзінства" ў той ці іншай ступені ахопяць усю Беларусь. Маштабныя сустрэчы ў рэгіёнах, аб чым на патрыятычным форуме "Калі мы адзіныя" гаварыў Аляксандр Лукашэнка, прадаставяць магчымасць беларусам убачыць усю палітру талентаў роднай зямлі, далучыцца да багатай спадчыны нацыянальнай культуры.

Маштабныя канцэрты, якія пройдуць у розных беларускіх гарадах, падораць гледачам нямала станоўчых эмоцый. Па сутнасці, яны стануць прадаўжэннем унікальнага патрыятычнага форуму, праведзенага ў сталіцы ў Дзень народнага адзінства, дзе на адной пляцоўцы перад публікай выступалі прафесійныя і самадзейныя калектывы розных узростаў, якія прыехалі практычна з усіх куткоў Беларусі. Гледачы змогуць не толькі ўбачыць выступленні сваіх любімых мясцовых выканаўцаў, але і пазнаёміцца з творчымі нумарамі, падрыхтаванымі спецыяльна для "Марафону адзінства" ўдзельнікамі з іншых рэгіёнаў.

"Марафон адзінства" - гэта не толькі цудоўная магчымасць акунуцца ў беларускую самабытную культуру на канцэртнай пляцоўцы. Як акцэнтуюць увагу арганізатары, марафон абяцае быць насычаным самымі разнастайнымі па фармаце мерапрыемствамі. Ёсць імкненне зрабіць акцыю сапраўды маштабнай, ахапіць максімальна шырокую ўзроставую аўдыторыю. Яшчэ адна задача, якую ставяць перад сабой арганізатары марафону, - гэта выкарыстанне нестандартных рашэнняў па форме і змесце мерапрыемстваў, выкарыстанне розных інтэрактываў.

У прыватнасці, у рамках "Марафону адзінства" запланаваны для правядзення адкрыты конкурс малюнка вучняў пачатковых класаў "Мы разам", рэспубліканскі конкурс твораў на тэму "Што такое адзінства", рэспубліканскі конкурс праектаў "Мой уклад у будучыню краіны", серыя мерапрыемстваў у ССНУ "НЕ сумная НЕ лекцыя", серыя мерапрыемстваў "Знакавая сустрэча", стварэнне муралаў, гарадскія квесты "Гэта ўсё маё роднае" і інш.

Усе падрабязнасці аб падрыхтоўцы і правядзенні рэспубліканскай грамадска-культурнай акцыі "Марафон адзінства" можна даведацца 25 верасня на прэс-канферэнцыі, у якой прымуць удзел:

- Эйсмант Наталля Мікалаеўна - прэс-сакратар Прэзідэнта Рэспублікі Беларусь;
- Маркевіч Анатоль Мечыслававіч - міністр культуры Рэспублікі Беларусь;
- Пятруцкая Кацярына Аляксандраўна - намеснік міністра адукацыі Рэспублікі Беларусь;
- Лукашэнка Ганна Сяргееўна - кіраўнік рабочай групы па падрыхтоўцы акцыі "Марафон адзінства";
- Гузель Андрэй Антонавіч - дырэктар ТАА "Музычная медыякампанія";
- Гігін Вадзім Францавіч - генеральны дырэктар Нацыянальнай бібліятэкі Беларусі, старшыня праўлення рэспубліканскага дзяржаўна-грамадскага аб'яднання "Беларускае таварыства "Веды".-0-

БЕЛТА - Навiны Беларусi