Лукашэнка падтрымаў праект указа па зарплатах у бюджэтнай сферы

Прэзідэнт Беларусі Аляксандр Лукашэнка падтрымаў праект указа па зарплатах у бюджэтнай сферы. Аб гэтым сёння заявіў журналістам міністр фінансаў Максім Ермаловіч, перадае карэспандэнт БЕЛТА.

Адна з норм датычыцца падтрымання заработнай платы работнікаў бюджэтных арганізацый не ніжэй за памер мінімальнай заработнай платы і правядзення ім адпаведных даплат у выпадку вымушанай няпоўнай занятасці або аб'яўлення прастою. "Даплаты будуць зроблены за кошт бюджэту. Але толькі на розніцу паміж тым, што выплачваецца самой арганізацыяй, і мінімальнай заработнай платай", - удакладніў Максім Ермаловіч.

"Сутнасць праекта ўказа ў тым, што неабходна вырашаць праблему, якая ўзнікла ва ўстановах бюджэтнай сферы. Наша сацыяльная інфраструктура стваралася з улікам таго, што акрамя аказання бюджэтных паслуг аб'екты гэтай інфраструктуры будуць аказваць і паслугі насельніцтву за плату. У бюджэтных каштарысах на ўтрыманне такіх аб'ектаў выкарыстоўваюцца і пазабюджэтныя даходы. Асабліва гэта датычыцца ўстаноў спорту, культуры, аховы здароўя", - расказаў міністр.

Паводле яго слоў, у сувязі са скарачэннем наведвальнасці апошнім часам крыніцы фарміравання даходаў істотна знізіліся, асабліва за мінулыя два месяцы. "Таму для таго каб захаваць калектывы, падтрымаць людзей, занятых аказаннем платных паслуг, неабходна прымаць меры, у тым ліку накіраваныя на фарміраванне крыніц для аплаты гэтых расходаў", - заявіў Максім Ермаловіч.

Адпаведныя падыходы падтрыманы кіраўніком дзяржавы, аднак падтрымка будзе аказвацца ва ўмовах жорсткіх бюджэтных абмежаванняў. Размова ідзе аб тым, што арганізацыям неабходна захоўваць рабочыя месцы, шукаць новыя шляхі для таго, каб зарабіць грошы, прыцягваць насельніцтва, аднаўляць пазабюджэтныя даходы. "Толькі ў тым выпадку, калі гэта дзейнасць па нейкіх аб'ектыўных прычынах будзе нявыкананай, толькі тады ў падтрымку будзе ўступаць бюджэт", - падкрэсліў міністр фінансаў.

Распарадчыкам бюджэтных сродкаў на рэспубліканскім і мясцовым узроўнях будзе прадастаўлена права ўносіць змяненні ў бюджэтныя каштарысы і браць на сябе частку расходаў, якія павінны былі аплачвацца за кошт пазабюджэтных даходаў арганізацый. "Але гэта магчыма толькі ў тым выпадку, калі такіх даходаў няма па аб'ектыўных абставінах і прадпрыемства прыклала ўсе намаганні", - яшчэ раз звярнуў увагу Максім Ермаловіч.

"Думаю, што мера ўказа часовая, і паступова людзі будуць вяртацца да нармальнага жыцця, наведваць установы спорту, культурныя мерапрыемствы. І ў канчатковым выпадку адновяць бюджэтныя даходы", - сказаў міністр фінансаў.

У цэлым ён мяркуе, што для большай часткі арганізацый, у тым ліку мясцовага ўзроўню, не спатрэбіцца выдзяленне дадатковых сродкаў з бюджэту. "Адбудзецца пераразмеркаванне. Дзесьці сэканомяць нейкія расходы па іншых напрамках. Вызваляцца рэсурсы, каб падтрымаць тых, хто ў гэтым мае патрэбу", - адзначыў міністр.

"Для арганізацый, асабліва рэспубліканскага ўзроўню, дзе доля пазабюджэтных даходаў высокая, таксама будзе такая магчымасць адшукаць гэтыя рэсурсы ўнутры бюджэтнага каштарыса, пераразмяркоўваючы. Міністэрства фінансаў будзе гэты працэс строга кантраляваць. Зноў жа, бюджэтныя абмежаванні і падыход да выдзялення дадатковых рэсурсаў павінны суправаджацца дзеяннямі самой арганізацыі па скарачэнні гэтай патрэбнасці - прыняццем усіх мер для аўнаўлення пазабюджэтных даходаў", - растлумачыў Максім Ермаловіч.

На заканчэнне ён падкрэсліў, што, паводле агульнай ацэнкі, вялікіх дадатковых бюджэтных рэсурсаў для названых мэт не спатрэбіцца. "Гэта будуць кропкавыя рашэнні адносна канкрэтных арганізацый", - дадаў кіраўнік Мінфіна.-0-

НАВIНЫ БЕЛАРУСI