У тыдзень бацькоўскай любові БСЖ удзеліць асаблівую ўвагу дзецям з сацыяльна-педагагічных цэнтраў

У тыдзень бацькоўскай любові БСЖ удзеліць асаблівую ўвагу дзецям з сацыяльна-педагагічных цэнтраў. Аб гэтым на прэс-канферэнцыі ў Нацыянальным прэс-цэнтры, прымеркаванай да Дня маці і Дня бацькі, расказала член Прэзідыума ГА "Беларускі саюз жанчын" Вольга Чамаданава, паведамляе карэспандэнт БЕЛТА.

Упершыню ў Беларусі з 14 па 21 кастрычніка будзе праведзены тыдзень бацькоўскай любові, які пачнецца са святкавання Дня маці 14 кастрычніка і завершыцца новаўведзеным Днём бацькі 21 кастрычніка. Як адзначыла Вольга Чамаданава, асноўная мэта мерапрыемстваў, арганізаваных у тыдзень бацькоўскай любові, - нагадаць грамадзянам аб важнасці захавання сямейных каштоўнасцей і сямейных традыцый і значнасці ўвагі маці і бацькі да сваіх дзяцей.

"З учарашняга дня Мінская гарадская арганізацыя БСЖ сумесна з Белпоштай праводзіць акцыю "Адпраў паштоўку маме". Сёння ў Мінгарвыканкаме было шмат жадаючых падпісаць паштоўкі. Тут жа быў паштальён, які сабраў гэтыя пасланні і аднёс на пошту. Мы максімальна пастараліся ахапіць увесь горад і ўсіх жадаючых паўдзельнічаць у акцыі. Магу падзяліцца ўласнымі ўражаннямі і тым, з якой любоўю, з якім жаданнем людзі запаўнялі паштоўкі. Паколькі на самай справе гэта вельмі важна. Так, можна і смс адправіць маме, можна і пазваніць, але гэта на адзін момант, а паштоўка захоўваецца як даніна памяці і павагі да сваёй маці", - адзначыла Вольга Чамаданава.

14 кастрычніка Мінская гарадская арганізацыя БСЖ запрашае ўсіх жадаючых у ГЦ "Сталіца", дзе з 12 да 18 гадзін будзе праведзена святочнае мерапрыемства, у праграме якога прадугледжаны розныя інтэрактыўныя гульні для дзяцей, адкрыццё фотавыстаўкі на тэму сям'і, выступленне заслужаных артыстаў беларускай эстрады і конкурсы. Адметнасцю мерапрыемства стане акцыя віншавання мам з вялікай сцэны "Сталіцы". "Гэта будзе анлайн-віншаванне бацькоў, якія, на жаль, цяпер знаходзяцца далёка, а іх дзеці тут, у Мінску. Вось мы аб'явілі такі праект і запрасілі для ўдзелу ў ім курсантаў Акадэміі МУС, а таксама маладых спецыялістаў прамысловых прадпрыемстваў, якія не маюць магчымасці 14 кастрычніка ўбачыць сваю маму і ўручыць ёй кветкі. Я думаю, што ў нас усё атрымаецца і мы абавязкова гэту акцыю правядзём вельмі паспяхова", - падкрэсліла член Прэзідыума ГА "Беларускі саюз жанчын".

Асаблівую ўвагу ў тыдзень бацькоўскай любові БСЖ удзеліць дзецям, якія знаходзяцца ў сацыяльна-педагагічных цэнтрах. "З 18 па 20 кастрычніка будуць арганізаваны экскурсіі для дзяцей СПЦ Мінска, а ў нас іх усяго 6, на вядучыя тэлеканалы нашай краіны. Гэта АНТ, тэлеканалы Белтэлерадыёкампаніі, СТБ. Будуць арганізаваны экскурсіі, чаяпіцці, сустрэчы з кіраўнікамі каналаў. Акрамя таго, 14 кастрычніка пройдзе цікавае мерапрыемства, арганізаванае сумесна з Белдзяржцыркам. Дзеці з СПЦ наведаюць закуліссе цырка, а ў 19 гадзін будзе арганізаваны паказ. Я думаю, што гэта выкліча таксама станоўчыя эмоцыі і падорыць добры настрой", - заўважыла Вольга Чамаданава.

Паводле слоў Прэзідыума ГА "Беларускі саюз жанчын", у тыдзень бацькоўскай любові мерапрыемствы, прымеркаваныя да Дня маці і Дня бацькі, пройдуць ва ўсіх рэгіёнах краіны. У Гродзенскай вобласці адбудзецца першы абласны сямейны кангрэс на базе Мірскага замка. У праграме кангрэса ўручэнне прэміі "Бацькоўская слава", васільковы сямейны баль і ўрачыстае пасяджэнне школы паспяховых бацькаў "Давер". У Гомельскай вобласці мазырскі дзіцячы тэатр пры фінансавай падтрымцы Беларускага саюза жанчын і Беларусбанка паставіць спектакль "Усе прафесіі важны". У Мінскай і Віцебскай абласцях пройдуць форумы, прысвечаныя захаванню сямейных каштоўнасцей. У Мінскай вобласці форум "Пад крылом бацькоўскай любові" пройдзе 19 кастрычніка ў Жодзіне. У Віцебскай вобласці форум "Бацькоўская любоў - вялікая сіла" адбудзецца 20 кастрычніка. Як заўважыла Вольга Чамаданава, такія форумы - цудоўная магчымасць адзначыць некага з сем'яў, хто актыўна ўдзельнічае ў грамадскім жыцці.

Заводы і прадпрыемствы Мінска таксама ўключаны ў святочны тыдзень і правядуць свае карпаратыўныя мерапрыемствы. "Я заўсёды кажу, што мама можа замяніць усіх, але ніхто і ніколі не заменіць маму", - рэзюмавала Вольга Чамаданава.-0-

БЕЛТА - Навiны Беларусi