Праект "Сучасная медыцына ў рэгіёны" павялічыць прафесійны патэнцыял медыкаў ЦРБ

Удзел у праекце "Сучасная медыцына ў рэгіёны" дасць магчымасць павялічыць прафесійны патэнцыял работнікаў ЦРБ. Аб гэтым журналістам сказаў галоўны ўрач Лідскай ЦРБ Вадзім Трубчык, перадае карэспандэнт БЕЛТА.

"Мы з задавальненнем далучыліся да рэалізацыі праекта. У нас ёсць вялікі патэнцыял, у тым ліку кадравы, які трэба рэалізоўваць. Ёсць дастатковая колькасць работнікаў, якія ўжо многае ўмеюць, і задача - пашырыць колькасць методык, якімі яны будуць валодаць і выкарыстоўваць у рабоце, у першую чаргу ў сферы малаінвазіўнай хірургіі", - сказаў Вадзім Трубчык.

Ён расказаў, што крыху больш за месяц таму ў Лідскай ЦРБ была ўведзена ў эксплуатацыю новая эндаскапічная стойка хірурга. Абсталяванне дазволіла пашырыць магчымасці ўрачоў. "І цяпер мы хочам павучыцца, каб паскорыць укараненне новых методык у бальніцы. Так мы зможам выкарыстоўваць большы спектр хірургічных малаінвазіўных працэдур. Новая стойка - гэта цэлы комплекс: якасная оптыка, якасныя інструменты. Хірургу без гэтага абсталявання рабіць ювелірна дакладныя рэчы цяжка, а з уводам абсталявання гэта стане магчымым", - дадаў галоўны ўрач.

Вадзім Трубчык дадаў, што паралельна ў рамках рэалізацыі праекта на базе Лідскай ЦРБ абмяркоўваюцца іншыя магчымасці паляпшэння якасці дыягностыкі. "Гэта датычыцца высокатэхналагічных методык камп'ютарнай тамаграфіі, у перспектыве - магнітна-рэзананснай тамаграфіі. Акрамя таго, што мы можам гэта рабіць, хочам павялічыць якасць уменняў ацэнкі гэтых методык - прафесіяналізм людзей імкнёмся пастаянна павышаць. Важна, што дзякуючы рэалізацыі праекта мы зможам не толькі павучыцца на абсталяванні на выездзе, але і прайсці больш якасную падрыхтоўку на нашых апаратах. Гэта дасць патрэбны эфект", - адзначыў галоўны ўрач.

Рэспубліканскі клінічны медыцынскі цэнтр пачынае ў Лідзе работу па праграме "Сучасная медыцына ў рэгіёны". Праграма разлічана на год, у яе аснове праграма 2021 года "Эндавідэахірургія ў рэгіёны". Лідская ЦРБ асабліва зацікаўлена ў прафпадтрымцы па пашырэнні спектра дыягнастычнай і лячэбнай дапамогі, павышэнні якасці дыягнастычных і лячэбных працэдур. У час адукацыйнага семінара, які адбыўся ў Лідскай ЦРБ, лячэбная камісія цэнтра вывучыла дыягнастычнае і лячэбнае абсталяванне бальніцы і сумесна з калектывам медустановы вызначыла напрамкі і спецыяльнасці для ўкаранення і развіцця сучасных тэхналогій у курыруемай бальніцы.

У праграму "Сучасная медыцына ў рэгіёны" таксама ўвайшлі Салігорская раённая бальніца ў Мінскай вобласці, Луніненцкая, Кобрынская і Бярозаўская - у Брэсцкай. А ў Гродзенскай вобласці акрамя Лідскай ЦРБ у праграму ўключылася Астравецкая ЦРБ.-0-