"Кніжка на далоньцы". Акцыя бібліятэкараў Беларусі і Расіі пройдзе 30 жніўня ў Гродне і Дзяржынску

Сумесную акцыю беларускіх і расійскіх бібліятэкараў "Кніжка на далоньцы" правядуць 30 жніўня. Аб гэтым карэспандэнту БЕЛТА расказала загадчыца аддзела маркетынгу Гродзенскай гарадской цэнтральнай бібліятэкі імя А.Макаёнка Наталля Наземцава.

"Кніжка на далоньцы" - акцыя, якая прызначана пазнаёміць маленькіх чытачоў са светам сучаснай дзіцячай літаратуры. І, вядома, дапамагчы педагогам, выхавальнікам і бацькам сарыентавацца ў свеце добрых дзіцячых кніг. Таму гарадскія бібліятэкі запрашаюць бацькоў, выхавальнікаў, педагогаў, а галоўнае - дзяцей ва ўзросце 5-7 гадоў далучыцца да акцыі. Бібліятэкі Гродна правядуць яе 30 жніўня. Удзельнікамі акцыі пяты раз стануць выхаванцы дзіцячых дашкольных устаноў горада", - сказала Наталля Наземцава.

Паводле слоў загадчыцы аддзела маркетынгу, у бягучым годзе акцыя асаблівая: да гродзенскіх бібліятэкараў далучацца калегі з горада Дзяржынска Ніжагародскай вобласці. У дзіцячых бібліятэках горада - пабраціма Гродна прачытаюць юным слухачам кнігі беларускіх аўтараў, у тым ліку гродзенскіх. Напрыклад, Таццяны Сучковай і Наталлі Бучынскай, Генадзя Аўласенкі і Яніны Жабко.

"А ў дзевяці гродзенскіх бібліятэках прагучаць тэксты сучасных расійскіх аўтараў - творы Настассі Арловай, Асі Пятровай, Ірыны Зартайскай, Юліі Весавай, Марыны Дарочанкавай, Андрэя Усачова", - удакладніла Наталля Наземцава.-0-

БЕЛТА - Навiны Беларусi